دُکھتے ہوئے دلوں کی صدا ماتمِ حسین ؑ
| معلومات | |
|---|---|
| شاعر کا نام | محسن نقوی |
| قالب | سلام |
| وزن | مفعول فاعلات مفاعیل فاعلات |
| موضوع | ماتم حسین ؑ |
| زبان | اردو |
| تعداد بند | 9 بند |
دُکھتے ہوئے دلوں کی صدا ماتمِ حسین ؑ حماد اہل بیت ؑ سید محسن نقوی کا سلامِ عقیدت ہے۔
تعارف
پیش نظر سلام میں امام حسین ؑ کی یاد میں کئے جانے والے ماتم کی وجوہات کو عقیدے کی نظر سے خوبصورت انداز میں واضح کرنے کی کوشش کی گئی ہے۔
مکمل کلام
| دُکھتے ہوئے دلوں کی صدا ماتمِ حسین ؑ | یعنی خراجِ سیلِ وفا ماتمِ حسین ؑ | |
| جب تک یزیدیت ہے مُحیطِ فراتِ دل | کرتی رہے گی میری اَنا ماتمِ حسین ؑ | |
| دربارِ ایزدی میں بصد حُسنِ اہتمام | تاثیرِ التماسِ دعا ماتمِ حسین ؑ | |
| ہر دورِ ظلم و جور میں باطل کے سامنے | اعلانِ جنگ و طبل ِ وغا ماتمِ حسین ؑ | |
| فرطِ اَلم سے میرے ، فرشتے بھی رو پڑے | جب گوشۂ لحد میں کیا ماتمِ حسین ؑ | |
| اس کی دھمک سے زلزلے قصرِ یزید میں | ترکیبِ ردِّ رنج و بلا ماتمِ حسین ؑ | |
| پلکیں جھپک جھپک کے ثبوت عَزا ملے | کرتی ہے آنکھ صبح و مسا ماتمِ حسین ؑ | |
| میں سوچ ہی رہا تھا علاجِ غمِ حیات! | بے ساختہ کسی نے کہا "ماتمِ حسین ؑ" | |
| پابندیاں ہزار ہوں اِس ذکر پر مگر | محسن کریں گے ہم تو سَدا ماتمِ حسین ؑ[1] |
حوالہ جات
- ↑ محسن نقوی، فراتِ فکر: ص150
مآخذ
- محسن نقوی، میراثِ محسن، لاہور، ماورا پبلشرز، 2007ء.