اے شہرِ علم و عالمِ اسرارِ خشک وتر

اے شہرِ علم و عالمِ اسرارِ خشک وتر

معلومات
شاعر کا نام	محسن نقوی
قالب	نعت
وزن	مفعول فاعلات مفاعیل فاعِلن
موضوع	پیغمبر اکرم
زبان	اردو
تعداد بند	27 بند

اے شہرِ علم و عالمِ اسرارِ خشک وتر: حماد اہل بیت ؑ سید محسن نقوی کا نعتیہ کلام ہے۔

تعارف

حضور اکرم ؐ کی مدح سرائی میں محسن نقوی کا یہ کلام حسنِ بیان و زبان کی بہت سی خوبیوں کا حامل ہے۔ گویا وہ سرکارِ دوعالم کے متعلق زمان و مکاں کی بہت ساری حقیقتوں اور سچائیوں کو تغزلانہ رنگ دے کر سماعتوں میں رس گھول رہے ہیں۔

مکمل کلام

اے شہرِ علم و عالمِ اسرارِ خشک وتر		تو بادشاہِ دیں ہے، تو سلطانِ بحر وبر
ادراک و آگہی کی ضمانت ترا کرم!		اِیقان و اِعتقاد کا حاصل تری نظر
تیرے حروف نطقِ الٰہی کا معجزہ!		تیری حدیث سچ سے زیادہ ہے معتبر
قرآں تِری کتاب، شریعت تِرا لباس		تیری زرہ نماز ہے، روزہ تِری سپر
یہ کہکشاں ہے تیرے محلے کا راستہ!		تاروں کی روشنی ہے تری خاکِ رہگذر
میری نظر میں خُلد سے بڑھ کر تِری گلی		رفعت میں مثل عرشِ بریں تیرے بام و در
جبریل تیرے در کے نگہباں کا ہم مزاج		باقی ملائکہ تِری گلیوں کے کوزہ گر
محفوظ جس میں ہو تیرے نقشِ قدم کا عکس		کیوں آسماں کا سر نہ جھکے ایسی خاک پر؟
کیا شے ہے برق، تابشِ جستِ بُراق ہے		معراج کیا ہے، صرف تِری سرحدِ سفر
موجِ صبا کو ہے تِری خوشبو کی جُستجو		جیسے کسی کے در کی بھکارن ہو در بدر
قامت تِرا ہے روزِ قیامت کا آسرا		خورشیدِ حشر، ایک نگیں تیرے تاج پر
ہر رات تیرے گیسوئے عنبر فشاں کی یاد		تیرے لبوں کی آئینہ بردار ہے سحر!
آیات تیرے حُسنِ خدو خال کی مثال		واللیل تیری زُلف ہے رُخسار والقمر
وَالعصر زاویہ ہے تِری چشمِ ناز کا		وَالشّمس تیری گرمئ انفاس کا شرر
یٰسین تیرے نام پہ الہام کا غلاف		طٰہٰ تِرا لقب ہے، شفاعت تِرا ہُنر
کُہسار پاش پاش ہیں اَبرو کی ضرب سے		دولخت چاند ہے تِرے ناخن کی نوک پر
دریا تِرے کرم کی طلب میں ہیں جاں بہ لب		صحرا تِرے خرام کی خاطر کماں بہ سر!
تیرا مزاج بخششِ پیہم کی سلسبیل		تیری عطا خزانۂ رحمت ہے سَر بہ سَر
تیرے فقیر اب بھی سلاطینِ کج کلاہ		تیرے غلام اب بھی زمانے کے چارہ گر
یہ بھی نہیں کہ میرا مرض لاعلاج ہو!		یہ بھی نہیں کہ تجھ کو نہیں ہے مِری خبر!!
ہاں پھر سے ایک جنبشِ اَبرو کی بھیک دے		ہاں پھر سے اِک نگاہِ کرم میرے حال پر
سایہ عطا ہو گنبدِ خضریٰ کا ایک بار		جھلسا نہ دے غموں کی کڑی دُھوپ کا سفر
تیرے سوا کوئی بھی نہیں ہے جہاں پناہ!		ہو جس کانام باعثِ تسکیں پئے جگر
محسؔن کہ تیری راہگذر کا فقیر ہے!		اُس پر کرم دیارِ نبوّت کے تاجور
دے رِزقِ نطق مجھ کو بنامِ علی ؑ ولی		یا بہرِ فاطمہؑ وہ تِرا پارۂ جگر
حسنین ؑ کے طفیل عطا کر مجھے بہشت		میری دُعا کے رُخ پہ چھڑک شبنمِ اَثر
تیرے سِوا دُعا کے لیے کس کا نام لوں؟		"بعد از خدا بزرگ توئی قصہ مختصر"

مآخذ

• محسن نقوی، میراثِ محسن، لاہور، ماورا پبلشرز، 2007ء.