نہ پوچھ میرا حسین کیا ہے
| معلومات | |
|---|---|
| شاعر کا نام | محسن نقوی |
| قالب | ترجیع بند |
| وزن | مفاعلاتن مفاعلاتن |
| موضوع | حضرت امام حسین ؑ |
| زبان | اردو |
| تعداد بند | 22 بند |
نہ پوچھ میرا حسین کیا ہے حضرت امام حسین ؑ کے تعرف میں حماد اہل بیت ؑ سید محسن نقوی کا ایک شاہکار کلام ہے۔
تعارف
سید الشہدا حضرت امام حسین ؑ کی شخصیت پر مختلف جہات سے روشنی ڈالتی اس ترجیع بند میں غالبا ہر 7 بند کے بعد "نہ پوچھ میرا حسین ؑ کیا ہے؟" کا اعادہ کیا گیا ہے۔ کلام کا حُسن آپ پڑھتے ہوئے محسوس کریں گے۔
مکمل کلام
| جہانِ عزم و وفا کا پیکر | خرد کا مرکز ، جنوں کا محور | |
| جمالِ زہرا ؑ، جلالِ حیدرؑ | ضمیرِ انساں ، نصیرِ داور | |
| زمیں کا دل ، آسماں کا یاور | دیارِ صبر و رضا کا دلبر | |
| کمالِ ایثار کا پیمبر | شعورِ امن و سکوں کا پیکر | |
| جبینِ انسانیت کا جھومر | عرب کا سہرا ، عجم کا زیور | |
حسین ؑ تصویرِ انبیاء ؑ ہے | ||
نہ پوچھ میرا حسین ؑ کیا ہے؟ | ||
| حسین ؑ اہل وفا کی بستی | حسین ؑ آئینِ حق پرستی | |
| حسین ؑ صدق و صفا کا ساقی | حسین ؑ چشمِ اَنا کی مستی | |
| حسین ؑ پیش از عدم، تصور | حسین ؑ بعد از قیام ہستی | |
| حسین ؑ نے زندگی بکھیری | فضا سے ورنہ قضا برستی | |
| عروجِ ہفت آسمانِ عظمت | حسین ؑکے نقشِ پا کی مستی | |
| حسین ؑ کو خلد میں نہ ڈھونڈو | حسین ؑمہنگا ہے خلد سستی | |
حسینؑ مقسومِ دین و ایماں | ||
حسین ؑ مفہومِ "ہل اتیٰ" ہے | ||
نہ پوچھ میرا حسین ؑ کیا ہے؟ | ||
| حسینؑ دل ہے، حسین ؑ جاں ہے | حسین ؑ قرآن کی زباں ہے | |
| حسین ؑ عرفاں کی سلطنت ہے | حسین ؑ اسرار کا جہاں ہے | |
| حسین ؑ سجدوں کی سرزمیں ہے | حسین ؑ ذہنوں کا آسماں ہے | |
| حسین ؑ زخموں بھری جبیں ہے | حسین ؑ عظمت کا آستاں ہے | |
| اٹھا رہا ہے جو لاشِ اکبر ؑ | حسین ؑ بوڑھا نہیں جواں ہے | |
| وہ سرخروئے نشیبِ صحرا | وہ سربلندِ سرِ سناں ہے | |
وہ بدرِ افلاک ِ آدمیت | ||
وہ صدرِ اربابِ کربلا ہے | ||
نہ پوچھ میرا حسین ؑ کیا ہے؟ | ||
| حسین ؑ ایماں کی جستجو ہے | حسین ؑ یزداں کی آبرو ہے | |
| حسین ؑ تنہا تھا کربلا میں | حسین ؑ کا ذکر چار سو ہے | |
| فرات کی نبض رُک گئی ہے؟ | حسین ؑ مصروفِ گفتگو ہے | |
| جہاں گلابوں سے اَٹ گیا ہے | حسین ؑ شاید لہو لہو ہے | |
| حیات کے ارتقا سے پوچھو | حسین ؑ پیغمبرِ نمو ہے | |
| حسین ؑ کا حوصلہ نہ پوچھو | حسین ؑ لٹ کر بھی سرخرو ہے | |
وہ دیکھو فوجوں کے درمیاں بھی | ||
حسین ؑ تنہا ڈٹا ہوا ہے | ||
نہ پوچھ میرا حسین ؑ کیا ہے؟ | ||
| حسین ؑ نکھرا ہوا قلندر | حسینؑ بپھرا ہوا سمندر | |
| حسین ؑ بستے دلوں سے آگے | حسین ؑ اجڑے دلوں کے اندر | |
| حسین ؑ سلطانِ دین و ایماں | حسین ؑ افکار کا سمندر | |
| حسین ؑ سے آدمی کا رتبہ | حسین ؑ ہے آدمی کا "من دَر" | |
| خدا کی بخشش ہی خیمہ زَن ہے | حسین ؑ کی سلطنت کے اندر | |
| حسین ؑ داتا، حسین ؑ راجہ | حسین ؑ بھگون، حسین ؑ سندر | |
حسین ؑ آکاش کا رشی ہے | ||
حسین ؑ دھرتی کی آتما ہے | ||
نہ پوچھ میرا حسین ؑ کیا ہے؟ | ||
| حسین ؑ، میدان کا سپاہی | حسین ؑ دشتِ اَنا کا راہی | |
| حسین ؑ، فرقِ اَجل کا بَل ہے | حسین ؑ اندازِ کجکلاہی! | |
| حسین ؑ کی گردِ پا ، زمانہ! | حسین ؑ کی ٹھوکروں میں شاہی | |
| حسین ؑ، معراجِ فقرِ عالم | حسین ؑ، رمزِ جہاں پناہی | |
| حسین ؑ ایقان کا منارہ | حسین ؑ اوہام کی تباہی | |
| ضمیرِ انصاف کی لغت میں | حسین ؑ معیارِ بے گناہی | |
بنامِ جبر و غرورِ شاہی | ||
حسین ؑ غیرت کا فیصلہ ہے | ||
نہ پوچھ میرا حسین ؑ کیا ہے؟ | ||
| حسین ؑ فقر و اَنا کا غازی | حسین ؑ جنگاہ میں نمازی | |
| حسین ؑ حُسنِ نیاز مندی | حسین ؑ اعجازِ بے نیازی | |
| حسین ؑ آغازِ جاں نثاری | حسین ؑ انجامِ جاں گدازی | |
| حسین ؑ توقیرِ کار بندی | حسین ؑ تعبیرِ کارسازی | |
| حسین ؑ معجز نمائے دوراں | حسین ؑ حق کی فسوں طرازی | |
| حسین ؑ ہارا تو یوں کہ جیسے | حسین ؑ نے جیت لی ہو بازی | |
حسین ؑ سارے جہاں کا وارِث | ||
حسین ؑ کہنے کو بے نوا ہے | ||
نہ پوچھ میرا حسین ؑ کیا ہے؟ | ||
| حسین ؑ پیغمبرِ بہاراں | حسین ؑ تسکینِ دل فگاراں | |
| حسین ؑ میرِ حجازِ ہستی | حسین ؑ سالارِ شہسواراں | |
| کہ دیدہ و دل کے دشت و دَر میں | حسین ؑ تمثیل ِ ابر و باراں | |
| حسین ؑ تدبیرِ جاں فروشاں | حسین ؑ تقدیرِ سوگواراں | |
| کبھی تو چشمِ ہنر سے دیکھو | حسین ؑ رشکِ رخِ نگاراں | |
| حسین ؑ حُسنِ مہِ محرم | حسین ؑ ہی عیدِ روزہ داراں | |
حسین ؑ سرمایہ اَنبیاء کا! | ||
حسین ؑ اعجازِ اولیاء ہے | ||
نہ پوچھ میرا حسین ؑ کیا ہے؟ | ||
| حسین ؑ اِک دلنشیں کہانی | حسین ؑ دستورِ حق کا بانی | |
| حسین ؑ عباس ؑ کا سراپا | حسین ؑ اکبر ؑ کی نوجوانی | |
| حسین ؑ کردارِ اہل ایماں | حسین ؑ معیارِ زندگانی | |
| حسین ؑ قاسم ؑ کی کم نمائی | حسین ؑ اصغر ؑ کی بے زبانی | |
| حسین ؑ سجاد ؑ کی خموشی | حسین ؑ باقر ؑ کی نوحہ خوانی | |
| حسین ؑ دجلہ کا خشک ساحل | حسین ؑ صحرا کی بیکرانی | |
حسین ؑ زینب ؑ کی کسمپرسی | ||
حسین ؑ کلثوم ؑ کی ردا ہے | ||
نہ پوچھ میرا حسین ؑ کیا ہے؟[1] | ||
حوالہ جات
- ↑ محسن نقوی، موجِ ادراک: ص111
مآخذ
- محسن نقوی، میراثِ محسن، لاہور، ماورا پبلشرز، 2007ء.