گزر گئے تھے کئی دن کہ گھر میں آب نہ تھا

گزر گئے تھے کئی دن کہ گھر میں آب نہ تھا: جناب میر انیس کا لکھا ہوا سلام ہے۔

گزر گئے تھے کئی دن کہ گھر میں آب نہ تھا

معلومات
شاعر کا نام	میر انیس
قالب	سلام
وزن	مفاعِلن فَعِلاتن مفاعِلن فَعِلن
موضوع	امام حسین ؑ اور پانی
زبان	اردو
تعداد بند	12 بند

تعارف

پیش نظر سلام میں نہر علقمہ کے کنارے ہوتے ہوئے حضرت امام حسین ؑ اور ان کے اہل و عیال کی تشنگی کا تذکرہ کیا گیا ہے اس کے ساتھ ساتھ سوالِ آب کی وجہ بھی بیان کی گئی ہے۔

مکمل کلام

گزر گئے تھے کئی دن کہ گھر میں آب نہ تھا		مگر حسین ؑسے صابر کو اضطراب نہ تھا
نمود و بودِ بشر کیا، محیطِ عالم میں		ہوا کا جب کوئی جھونکا چلا حباب نہ تھا
فشار سے جو بچائیں ہوا زمیں کوعجب		صدا یہ قبر نے دی حکمِ بوتراب ؑ نہ تھا
اگر بہشت میں ہوتے نہ کوثر و تسنیم		تو رونے والوں کی آنکھوں کا پھر جواب نہ تھا
نہ جانے برق کی چشمک تھی یا شرر کی لپک؟		ذرا جو آنکھ جھپک کر کھلی شباب نہ تھا
حسین ؑ اور طلب ِآب، اے معاذ اللہ!		تمام کرتے تھے حجت، سوالِ آب نہ تھا
جسے نبیؐ نے بُلایا، ہوا وہ نخل نہال		ثمر اُسے بھی دئیے جو کہ باریاب نہ تھا
حضورِ شاہ پھر آیا کہاں سے حرِّ شہید		خطا کی راہ میں گر جادۂ ثواب نہ تھا
علی ؑ کے پائے مبارک نے جو ضیاء پائی		وہ نور، حضرت ِموسیٰ ؑ کو دستیاب نہ تھا
ہر اِک کے ساتھ ہے روشن دلو !طلوع وغروب		سحر کو چاند نہ تھا، شب کو آفتاب نہ تھا
فقط حسین ؑ کے بچوں پہ بند تھا پانی		بہت قریب تھی وہ نہر، قحطِ آب نہ تھا
انیسؔ! عمر بسر کردو خاکساری میں		کہیں نہ یہ کہ غلامِ ابوتراب ؑ نہ تھا

مآخذ

• رضوی، سید مسعود الحسن، روح انیس، الٰہ آباد، انڈین پریس لمیٹڈ، بی تا.