فلک قتل سبط پیمبر ہے کل
| معلومات | |
|---|---|
| شاعر کا نام | میر تقی میر |
| قالب | رباعی |
| وزن | فَعُولن فَعُولن فَعُولن فَعَل |
| موضوع | مصائب کربلا |
| مناسبت | روز عاشورا |
| زبان | اردو |
| تعداد بند | 16 بند |
فلک قتلِ سبط ِپیمبر ہے کل: میر تقی میر دہلوی کا تصنیف کردہ مرثیہ ہے۔
تعارف
مکمل کلام
[1]
| فلک قتلِ سبط ِپیمبر ہے کل | ||
| یہ ہنگامہ ہونا مقرر ہے کل | ||
| سحر شامِ تیرہ سے بدتر ہے کل | ||
| بلا [2]کل [3]مکل ہے کہ محشر ہے کل | ||
| کہاں ہوگا افسر[4] سرِ شہ کہاں ! | ||
| یہ خیمہ کہاں اور خرگہ [5]کہاں ! | ||
| جو کچھ ہے حشم[6] آج، سو یہ کہاں ! | ||
| نہ حاکم، نہ یاور، نہ داور ہے کل | ||
| نہ ہوگا کوئی جو کرے داوری[7] | ||
| رہے گی وہ لاش اس زمیں پر پڑی | ||
| نگہبان ہوگا خدائے قوی | ||
| مصیبت عجب ایک اس پر ہے کل | ||
| نہ ہوگا کوئی یار و انصار ،آہ ! | ||
| نہ خویش و برادر، نہ رتبہ ،نہ جاہ | ||
| مرے گا بہت ہوکے بیکس، وہ شاہ | ||
| نہ قاسم ؑنہ اکبر ؑنہ اصغر ؑہے کل | ||
| جو بازو [8]ہیں جاویں گے سب دے کے جاں | ||
| نظر جس کے اوپر کرے سو کہاں | ||
| ستم ہوگا چاروں طرف سے عیاں | ||
| نہ احمدؐ معاون ،نہ حیدر ؑہے کل | ||
| نہ عباس ؑہوگا نہ ہوگا علم | ||
| کہ ہاتھ اس کا بازو سے ہوگا قلم [9] | ||
| رہیں گے جو پیچھے کسانِ حرم [10] | ||
| سو ان کو نہ جاگہ[11] نہ گھر در ہے کل | ||
| سرِ شہ نہ ہوگا یہ اَسرار ہے | ||
| کسانِ حرم اور بازار ہے | ||
| رہے گا جو سجادؑ بیمار ہے | ||
| سو اس کو نہ دارو [12]نہ بستر ہے کل | ||
| معزز حرم کے رہیں گے جو لوگ | ||
| پریشاں پھریں گے گرفتار سوگ | ||
| اسیری و غارت سے چالوں کو روگ | ||
| نہ پردہ انھوں کو نہ چادر ہے کل | ||
| جہاں جائے عبرت ہے کیا اعتبار | ||
| ہمیشہ نہیں ایک کا اختیار | ||
| شکستِ شہِ دیں سے ہے آشکار | ||
| نہ وہ کوکبہ[13] ہے نہ لشکر ہے کل | ||
| دمِ آب ہووے گا نایاب وہاں | ||
| نہ کنبہ ،قبیلہ، نہ احباب وہاں | ||
| نہ دولت سرا وہ نہ اسباب وہاں | ||
| نہ ساماں ، نہ سر ہے ، نہ سرور ہے کل | ||
| تن نازنیں ہوگا گھائل تمام | ||
| بلا ہوگا اس ایک پر اژدہام | ||
| جبیں سے بہے گا لہو لعل فام [14] | ||
| گلوئے مبارک پہ خنجر ہے کل | ||
| بچے گا جو بیٹا سو ہوگا اسیر | ||
| عزیزِ حرم سب بہ حالِ تغیر | ||
| بکا کرتے ہیں ہوں گے صغیر و کبیر | ||
| کہاں ایسی غارت سے وہ گھر ہے کل | ||
| سکینہ ؑکہے گی پدر کیا ہوا | ||
| کرے دل دہی جو گلے سے لگا | ||
| نہ کلثوم ؑکے پاس ہوگی ردا | ||
| نہ زینب ؑکے تارک[15] پہ معجر [16]ہے [17]کل | ||
| قیامت ہے اودھر کو ہوگا گزار | ||
| جدھر اس طرح کا ہوا کارزار | ||
| نظر آوے گی لاشِ شہ ایک بار | ||
| نہ ہوگا وہ ساماں ، نہ وہ سر ہے کل | ||
| نہ ہووے گا سادات میں مرد ایک | ||
| مگر عابدیں ؑزار اور زرد ایک | ||
| زمیں سے اٹھے گی سیہ گرد ایک | ||
| سپہرِ بریں تک مکدر ہے کل | ||
| سرِ شہ سناں پر رکھا جاوے گا | ||
| لٹا قافلہ بھی چلا جاوے گا | ||
| بس اب مت لکھے کیا لکھا جاوے گا | ||
| زمانہ ہی اے میرؔ دیگر ہے کل[18] |
حوالہ جات
- ↑ مراثی میر کے مؤلف کا کہنا ہے کہ یہ مرثیہ بشکریہ سکریٹری انجمن ترقی اردو (ہند) اردو جنوری 1931ء سے یہاں پیش کیا گیا۔
- ↑ بڑی، زبردست
- ↑ گڑ بڑ، رستخیز
- ↑ تاج
- ↑ بڑا خیمہ جو سب کے بیچ میں نصب کیا جاتا ہے۔
- ↑ شان و شوکت
- ↑ انصاف
- ↑ مددگار
- ↑ کٹ جانا
- ↑ حرم کے لوگ
- ↑ جگہ کو دلی والے جاگہ بولتے ہیں۔
- ↑ دوا
- ↑ شکوہ، حشمت
- ↑ ہمرنگ یاقوت
- ↑ مانگ
- ↑ چادر
- ↑ ردیف میں تقریبا ہر بند میں "ہوگا یا ہوگی" کی جگہ "ہے" استعمال کیا گیا ہے۔
- ↑ سید مسیح الزماں، مراثی میر: پانچواں مرثیہ، ص71
مآخذ
- سید مسیح الزماں، مراثی میر، لکھنؤ، انجمن محافظ اردو ، 1951ء.