مقام پیش خدا معتبر بتول کا ہے

مقام پیش خدا معتبر بتول کا ہے پروفیسر سید سبط جعفر زیدی کا خوبصورت کلام ہے۔

تعارف

یہ منقبت جناب سیدہ فاطمۃ الزہرا ؑ کی شان میں "مفاعِلن فَعِلاتن مفاعِلن فَعِلن" کے وزن پر لکھی گئی ہے۔ جس میں بی بی کے فضائل بیان کرنے کے ساتھ ساتھ ان کے پیروکاروں کو نماز روزہ اور خمس و ماتم تبلیغ بھی کی گئی ہے۔

مکمل کلام

مقام، پیشِ خدا معتبر بتول ؑ کا ہے		جو کائنات میں ہے خشک و تَر بتول ؑ کا ہے
خدا کے دین کا چرچا جو ہے زمانے میں		نہیں یہ اور کسی کا ثمر بتول ؑ کا ہے
خدیجہ ؑ اور محمد ؐ کی ہیں یہی وارث		ہے جتنا دین میں شامل وہ زَر بتول ؑ کا ہے
ہے دخل یوں تو مشیت میں پنجتن ؑ کو مگر		کسی کا اتنا نہیں جس قدر بتول ؑ کا ہے
تمام خلق جسے جبرئیل کہتی ہے		خدا کا عبد ہے بندہ مگر بتول ؑ کا ہے
یہاں سلام کو خیرُ الانام ؐ آتے ہیں		ادب سے آؤ یہاں پر یہ دَر بتول ؑ کا ہے
بڑھا دے فرشِ عزا، سوز و نوحہ و ماتم		خدا شکر کہ ملا کو ڈر بتول ؑ کا ہے
نماز و روزہ بھی واجب ہیں خمس و ماتم بھی		ذرا نہ کیجیو غفلت اگر بتول ؑ کا ہے
جھکانا چاہا تھا شیخین نے سرِ دربار		مگر یہ بھول گئے تھے یہ سر بتول ؑ کا ہے
مہک رہا ہے جو گلشن میں یہ گلِ عباس ؑ		یہ باغِ مرتضوی ؑ میں شجر بتول ؑ کا ہے
حسین ؑ اور حسن ؑ دونوں ہیں نبی ؐ کے پسر		علی ؑ کا لاڈلا غازی ؑ پسر بتول ؑ کا ہے
وہ شام و کوفہ میں خطباتِ زینب ؑ و سجاد ؑ		علی ؑ کی شان کا مظہر، اثر بتول ؑ کا ہے
خدا کا خاص کرم ہے جو سبطِ جعفر پر		عطا حسین ؑ کی، فیضِ نظر بتول ؑ کا ہے

مآخذ

• زیدی، پروفیسر سید سبط جعفر، بستہ، کراچی، محفوظ بک ایجنسی، طبع سوم، 1432ھ، 2011ء۔